શાહરૂખ ખાનની આગામી ફિલ્મમાં સલમાન ખાનનો કેમિયો હોવાની વાત

(પ્રતિનિધિ દ્વારા) મુંબઇ,તા. 06 નવેમ્બર 2020, શુક્રવાર

સલમાન ખાન અને શાહરૂખ ખાન રૂપેરી પડદે ફરી સાથે દેખાય તેવી શક્યતા છે. શાહરૂખ લાંબા બ્રેક પછી ફિલ્મ પઠાનથી ફરી કારકિર્દી શરૂ કરી રહ્યો છે. આ જ  ફિલ્મમાં સલમાન ખાન એક વિશેષ ભૂમિકામાં જોવા મળે તેવી સંભાવના છે. 

એક રિપોર્ટના અનુસાર, સલમાન ખાન આ ફિલ્મમાં એક કેમિયો કરવાનો છે. આ પહેલા સલમાનએ શાહરૂખની ફિલ્મ ઝીરોમાં મહેમાન ભૂમિકા ભજવી હતી. બન્ને સુપરસ્ટાર્સ એક-બીજાની ફિલ્મોમાં સ્પેશિયલ એપિયરન્સ આપ્યા કરતા હોય છે. સલમાનએ શાહરૂખની કુછ કુછ હોતા હૈ અને ઓમ શાંતિ ઓમમાં પણ વિશેષ રોલ કર્યો હતો. જ્યારે શાહરૂખ ખાનએ સલમાનની ફિલ્મ ટયૂબલાઇટ, હર દિલ જો પ્યાર કરેગા માં ગેસ્ટ અપિયરન્સ કર્યું હતું. 

શાહરૂખ ખાનની છેલ્લી ફિલ્મ ઝીરો બોક્સ ઓફિસ પર ઊધા માથે પટકાઇ હતી. આ પછી કિંગ ખાન નર્વસ થઇ ગયો હતો અને રૂપેરી પડદાથી દૂર થઇ ગયો હતો. જોકે તેનું નિર્માણહાઉસ એક પછી એક ફિલ્મો નિર્માણ કરતું રહ્યું છે. હવે શાહહરૂખ કમબેક કરી રહ્યો છે ત્યારે તેને હિટ ફિલ્મની તાતી જરૂર છે.

from Entertainment News - Gujarat Samachar : World's Leading Gujarati Newspaper https://ift.tt/3eAhP4B
via Latest Gujarati News