માયામી ઓપનમાં યોકોવિચ પ્રિ-ક્વાર્ટર ફાઈનલમાં હારી જતાં મેજર અપસેટ

માયામી, તા.૨૭

સર્બિયાના વર્લ્ડ નંબર વન ટેનિસ સ્ટાર યોકોવિચને ૨૫મો રેન્ક ધરાવતા સ્પેનના બૌતીસ્તા આગુટે ૧-૬, ૭-૫, ૬-૩થી હરાવતા માયામી ઓપનની પ્રિ-ક્વાર્ટર ફાઈનલમાં મેજર અપસેટ સર્જ્યો હતો. છેલ્લી ત્રણ ગ્રાન્ડ સ્લેમ ચેમ્પિયનશીપ જીતીને નંબર વનનો તાજ પાછો મેળવનારો યોકવિચ આ સતત બીજી ટુર્નામેન્ટમાં ક્વાર્ટર ફાઈનલ સુધી પણ પહોંચી શક્યો નથી. અગાઉ ઈન્ડિયન વેલ્સ માસ્ટર્સના રાઉન્ડ ઓફ ૩૨માં તેને જર્મનીના કોલ્સ્ચેઈબેરે હરાવ્યો હતો. 

હવે ક્વાર્ટર ફાઈનલમાં આગુટનો મુકાબલો અમેરિકાના જોન આઇસનર સામે થશે. સાતમો સીડ ધરાવતા આઈસનરે ૭-૬ (૭-૫), ૭-૬ (૭-૩)થી અત્યંત તનાવપૂર્ણ મેચમાં બ્રિટનના કાયલ એડમંડને પરાસ્ત કર્યો હતો. ૨૦ મો ક્રમાંક ધરાવતા કેનેડાના શાપોવાલોવે પણ અપસેટ સર્જતા આઠમો સીડ ધરાવતા ગ્રીસના યુવા ખેલાડી સિત્સિપાસને ૪-૬, ૬-૩, ૭-૬ (૭-૩)થી પરાજીત કર્યો હતો.

ફેરરને હરાવનારા અમેરિકી ખેલાડી ટિએફોએ પણ આગેકૂચ જારી રાખી હતી. તેણે ૧૮મો ક્રમાંક ધરાવતા બેલ્જીયમના ડેવિડ ગોફિન સામે ૭-૫, ૭-૬ (૮-૬)થી જીત મેળવતા અંતિમ આઠમા સ્થાન પ્રાપ્ત કર્યું હતુ. છઠ્ઠો સીડ ધરાવતા કેવિન એન્ડરસને પણ ઓસ્ટ્રેલિયાના થોમ્પ્સનને ૭-૫, ૭-૫થી પરાસ્ત કરતાં ક્વાર્ટર ફાઈનલમાં પ્રવેશ મેળવ્યો હતો.

ક્રોએશિયાના બોર્ના કોરિકે ઓસ્ટ્રેલિયાના કિર્ગીઓસને ૪-૬, ૬-૩, ૬-૨થી પરાસ્ત કર્યો હતો. 

ક્વાર્ટર ફાઈનલ્સ

ફેડરર વિ. મેડ્વેડેવ

આગુટ  વિ. આઇસનર

ટિએફો વિ. શાપોવાલોવ

કોરિક વિ. એલીસિમે 

from Sports News - Gujarat Samachar : World's Leading Gujarati Newspaper https://ift.tt/2HK7IwK
via Latest Gujarati News