બીયોન્ડ ધ ક્લાઉડ 24મી મેએ ચીનમાં રજૂ થશે

મુંબઇ તા.27 એપ્રિલ 2019, શનિવાર

ઓસ્કાર વિજેતા ઇરાની ફિલ્મ સર્જક માજિદ મજિદીની ફિલ્મ બીયોન્ડ ધ ક્લાઉડ ચીનમાં મેની 24મીએ રજૂ થશે એવી જાણકારી મળી હતી.

માતબર અભિનેત્રી સદ્ગત શ્રીદેવીની ફિલ્મ મોમ ચીનમાં રજૂ કર્યા બાદ હવે ઝી સ્ટુડિયો ઇન્ટરનેશનલ માજિદ મજિદીની ફિલ્મને ચીનમાં રજૂ કરશે એવી ઔપચારિક જાહેરાત સ્ટુડિયોના પ્રવક્તાએ કરી હતી.

સ્ટુડિયોએ એક જાહેર નિવેદનમાં જણાવ્યા મુજબ ચીનમાં હવે ભારતીય ફિલ્મો માટે એક માતબર માર્કેટ ખડુ થઇ ગયું છે અને  ચીનમાં રજૂ થયેલી મોટા ભાગની ભારતીય ફિલ્મો હિટ નીવડી છે. અમે અગાઉ રજૂ કરેલી બે ભારતીય ફિલ્મો ચીનમાં સારો બિઝનેસ કરી શકી હતી. હવે અમે માજિદ મજિદીની બીયોન્ડ ધ ક્લાઉડ ફિલ્મ રજૂ કરવાના છીએ.

બીયોન્ડ ધ ક્લાઉડમાં અકસ્માતે વિખૂટાં પડી જતાં બે ભાઇબહેનની વાર્તા છે. માજિદે આ ફિલ્મ ભારતીય લોકેશનોમાં ભારતીય કલાકારોને લઇને બનાવી છે. મોટા ભાગનાં લોકેશન મુંબઇનાં છે. ભારતમાં આ ફિલ્મ ગયા વર્ષના એપ્રિલમાં રજૂ થઇ હતી.

from Entertainment News - Gujarat Samachar : World's Leading Gujarati Newspaper http://bit.ly/2DAzEiB
via Latest Gujarati News