બોન્ડની 25મી ફિલ્મના હીરોને કેટલું પે કવર મળશે ?

લોસ એંજલ્સ તા.27 એપ્રિલ 2019, શનિવાર

દુનિયાભરના ફિલ્મ રસિકોને ઘેલું લગાડનારી જેમ્સ બોન્ડની 25મી ફિલ્મમાં હીરોનો રોલ કરનારા ડેનિયલ ક્રેગને આ ફિલ્મના મહેનતાણાં પેટે 450 કરોડ રુપિયા જેટલું મહેનતાણું મળશે એવા અહેવાલ પ્રગટ થયા હતા.

આજથી એટલે કે રવિવાર 28 એપ્રિલથી આ ફિલ્મ ફ્લોર પર જઇ રહી છે. 2006થી સતત ડેનિયલ ક્રેગ જેમ્સ બોન્ડ તરીકે રજૂ થતો રહ્યો છે. અત્યાર સુધીમાં એ આ સિરિઝની પાંચ ફિલ્મોમાં હીરો તરીકે ચમકી ચૂક્યો છે.

25મી બોન્ડ ફિલ્મ રેમન્ડ બેન્સનની નવલકથા નેવર ડ્રીમ ઑફ ડાયીંગ પર આધારિત હશે અને આ ફિલ્મ આવતા વરસે રજૂ કરવાની એના સર્જકોની યોજના છે.

છેલ્લી બોન્ડ ફિલ્મ કર્યા બાદ ક્રેગે એવી જાહેરાત કરી હતી કે હવે હું બોન્ડની ફિલ્મો કરવાનો નથી. એ પછી બોન્ડ તરીકે કયો હીરો આવી શકે એ વિશે મિડિયામાં ચર્ચા શરૂ થઇ હતી અને વિવિધ કલાકારોનાં નામો વહેતાં થયાં હતાં. પરંતુ ક્રેગની લોકપ્રિયતા જોતાં ફિલ્મ સર્જકોએ એનેજ  બોન્ડ તરીકે ચમકાવવાનો આગ્રહ રાખ્યો હતો અને એને સમજાવી લીધો હતો.

ડેનિયલ ક્રેગ ઉપરાંત આ ફિલ્મમાં લિયા સેડોક્સ અને રાફેલ ફિનેસ ચમકવાનાં છે. આ ફિલ્મના વિલન તરીકે બોહેમિયન ર્હેપ્સોડી ફેમ રામી મલિકને લેવામાં આવ્યો હોવાનું વેરાયટી ડૉટ કોમના એક અહેવાલમાં જણાવાયું હતું.

from Entertainment News - Gujarat Samachar : World's Leading Gujarati Newspaper http://bit.ly/2ZFjJJu
via Latest Gujarati News