નાસાની મહિલા અવકાશ યાત્રી ક્રિસ્ટીના અંતરિક્ષમાં સૌથી વધારે સમય રહેનારી મહિલા બનશે

વોશિંગ્ટન, તા. 20 એપ્રિલ 2019, શનિવાર

નાસાની અંતરિક્ષ યાત્રી ક્રિસ્ટીના કોચના ઈન્ટરનેશનલ સ્પેસ સ્ટેશન ખાતેના મિશનની અવધિમાં 11 મહિના જેટલો વધારો કરવામાં આવ્યો છે જેથી ક્રિસ્ટી સૌથી વધારે સમય આઈએસએસમાં વિતાવનારી પ્રથમ મહિલા બનશે. 

નાસાની મહિલા અંતરિક્ષ યાત્રી ક્રિસ્ટીના કોચ ટૂંક સમયમાં જ ઈન્ટરનેશનલ સ્પેસ સ્ટેશન (આઈએસએસ)માં સૌથી વધારે દિવસો વિતાવનારી પ્રથમ મહિલા બનશે. ક્રિસ્ટીનાના મિશનની અવધિમાં કરવામાં આવેલા વધારાને પગલે તે અંતરિક્ષ સ્ટેશનમાં ૩28 દિવસ વિતાવવાનો નવો રેકોર્ડ બનાવશે. કોઈ પણ મહિલા દ્વારા એકલા અંતરિક્ષમાં વિતાવાયેલો આ સૌથી લાંબો સમય ગાળો બની રહેશે. 

નાસા અને તેના આઈએસએસ સહયોગીઓ દ્વારા સ્પેસ સ્ટેશનમાં રોકાનારા નવા ચાલક દળ અને તેમના કાર્યક્રમને નિર્ધારીત કરવામાં આવ્યો છે. તે મુજબ અમેરિકી અંતરિક્ષ એજન્સી નાસાની એક સ્પેસ યાત્રી જેસિકા મીર પ્રથમ વખત આઈએસએસ પહોંચશે. જ્યારે નાસાના અન્ય એક અંતરિક્ષ યાત્રી એંડ્રુ મોર્ગનની યાત્રાની અવધિ વધારવામાં આવી છે.

ક્રિસ્ટીના કોચ ચાલુ વર્ષમાં 14 માર્ચના રોજ આંતરરાષ્ટ્રીય અંતરિક્ષ સ્ટેશનમાં પહોંચી હતી અને નવા કાર્યક્રમ મુજબ તે ફેબુ્રઆરી 2020 સુધી અંતરિક્ષમાં રહેશે. 

અગાઉ 2016-17ની સાલમાં અંતરિક્ષ યાત્રી પૈગી વ્હિટ્સને 288 દિવસ અંતરિક્ષ સ્ટેશનમાં વિતાવવાનો રેકોર્ડ બનાવ્યો હતો. પુરુષોમાં સ્કોટ કેલીએ સૌથી વધારે ૩40 દિવસ અંતરિક્ષ સ્ટેશનમાં વિતાવેલા છે. સ્કોટ કેલીએ 2015-16ની સાલમાં આ રેકોર્ડ સર્જ્યો હતો.

અમેરિકાના હ્યુસ્ટનમાં નાસાના જોનસન સ્પેસ સેન્ટર ખાતે માનવ અનુસંધાન કાર્યક્રમના મુખ્ય અધિકારી જેનિફર ફોગાર્ટીએ જણાવ્યા મુજબ ક્રિસ્ટીનાના મિશનને લંબાવવું ફાયદાકારી બની રહેશે કારણ કે તે લાંબા સમયથી જે દિશામાં કામ કરી રહી છે તે ડેટા ભવિષ્યમાં ચંદ્ર અને મંગળ ગ્રહના મિશન માટે ઉપયોગી સાબિત થશે. 

from International News - Gujarat Samachar : World's Leading Gujarati Newspaper http://bit.ly/2UpWDTm
via Latest Gujarati News