માસ્ક, હેન્ડ સેનિટાઈઝર્સ, હાથના મોજાનો જીવન જરૂરી મેડિસીનમાં સમાવેશ

(પીટીઆઈ)  નવી દિલ્હી, તા.13 માર્ચ, 2020, શુક્રવાર

કેન્દ્ર સરકારે એક મહત્વપૂર્ણ નોટિફિકેશન જાહેર કરીને માસ્ક, હેન્ડ સેનિટાઈઝર્સ, હાથના મોજાંને જીવન જરૂરી મેડિકલ પ્રોડક્ટ જાહેર કરી છે. આ પગલાં પછી કોરોના વાયરસના ભય વચ્ચે માસ્ક, હેન્ડ સેનિટાઈઝર્સ વગેરેના ભાવ અંકુશમાં રહેશે.

કોરોના વાયરસનો ભય વધતો જાય છે ત્યારે કેન્દ્ર સરકારે કોરોનાથી બચાવતી પ્રોડક્ટ - સર્જિકલ માસ્ક, હેન્ડ સેનિટાઈઝર્સ, હાથનાં મોજા વગેરેને આગામી 100 દિવસ માટે જીવન જરૂરી પ્રોડક્ટ જાહેર કરી છે.

જીવન જરૂરી પ્રોડક્ટ હોવાના કારણે આ પ્રોડક્ટ્સના ભાવ આડેધડ વધારી શકાશે નહીં. ભાવવધારો અંકુશમાં આવશે એટલે લોકો સાવચેતીના ભાગરૂપે આ પ્રોડક્ટ ખરીદતા થશે.

કોરોનાનો ભય હોવાથી અચાનક માસ્ક અને હેન્ડ સેનિટાઈઝર્સના ઓનલાઈન ભાવ પણ વધી ગયા હતા. એ પછી અચાનક અછત હોવાના અહેવાલો પણ વહેતા થયા હતા. આખરે કેન્દ્ર સરકારે આગામી 100 દિવસ માટે આ પ્રોડક્ટને જીવનજરૂરી ચીજવસ્તુઓમાં સામેલ કરીને મહત્વનું પગલું ભર્યું હતું.

એસેન્શિયલ કોમોડિટી એક્ટ-1955 અંતર્ગત આ નિર્ણય જાહેર કરાયાનું કેન્દ્ર સરકારે કહ્યું  હતું. આ નોટિફિકેશન તમામ રાજ્યો અને કેન્દ્ર શાસિત પ્રદેશોમાં લાગુ પડતું હોવાથી કોરોનાથી બચાવતી આ પ્રોડક્ટ્સના ભાવ દેશભરમાં અંકુશમાં રહેશે.

from National News - Gujarat Samachar : World's Leading Gujarati Newspaper https://ift.tt/2IKqq5B
via Latest Gujarati News